Simba yaipiga Ndanda FC 1-0

Mshambuliaji wa klabu ya soka ya Simba Emmanuel Okwi ameibuka shujaa leo kwenye mchezo dhidi ya Ndanda FC baada ya kufunga bao pekee, lililoipa ushindi timu hiyo na kuisogeza kwenye kutwaa ubingwa. 

Katika mchezo ambao umemalizika jioni hii kwenye uwanja wa Taifa jijini Dar es salaam, Okwi alifunga bao kupitia mkwaju mkali nje ya eneo la 18, katika dakika ya 43 kipindi cha kwanza. 

Kwa matokeo hayo sasa Simba imebakiza alama 1 tu kuweza kutwaa ubingwa wa Ligi kuu msimu wa 2017/18 ambapo katika mchezo ujao itacheza na Singida United kwenye uwanja wa Namfua mjini Singida. 

Baada ya ushindi wa leo Simba imeendeleza rekodi yake ya kushinda mechi zake zote dhidi ya Ndanda tangu timu hiyo ipande daraja misimu minne iliyopita. Simba imeshinda jumla ya mechi 8, 4 ikiwa ni uwanja wa taifa na 4 zingine ni uwanja wa Nangwanda Sijaona mjini Mtwara. 

Simba imefikisha alama 65 kileleni katika mechi zake 27 na ikiwa imesaliwa na mechi 3 ili kukamilisha mechi 30 za ligi msimu huu. Simba pia haijapoteza mchezo hata mmoja msimu huu.