Kauli ya kwanza ya Makonda baada ya Dar kushika nafasi ya kwanza

Mkuu wa Mkoa wa Dar es Salaam, Paul Makonda ametuma salamu za pongezi kwa watendaji na wadau wote wa elimu ambao wamefanikisha mkoa wake kushika nafasi ya kwanza kwenye matokeo ya darasa la saba yaliyotangazwa leo na Baraza la Mitihani la Taifa NEC. 

Kupitia ukurasa wake wa Instagram leo Makonda amewashukuru maafisa elimu, wazazi, walimu na wanafunzi  kwa kuunganisha nguvu zao kwa pamoja na hatimaye kuibuka vinara wa matokeo hayo. 

" Nawapongeza sana sana walimu, waratibu kata, maafisa elimu, wazazi pamoja na wanafunzi kwa kuunganisha nguvu na hatimaye tumeongoza katika matokeo ya darasa la saba Tanzania. Asanteni sana kwa kunivisha nguo na kumpa heshima Rais wetu mpendwa. 

" Ofisi yangu itaandaa utaratibu wa kutoa zawadi kama motisha na asante kwa kazi wanayoifanya walimu pamoja na wanafunzi. Tumeongoza tena kwa mara nyingine tena," amesema Makonda. 

Katika matokeo hayo Dar es Salaam imeshika nafasi ya kwanza ikifuatiwa na Geita, Arusha na Kilimanjaro. Mikoa mingine iliyoingia 10 bora ni Kagera, Mwanza, Iringa, Mtwara, Katavi na Njombe.