Simba yaichapa Biashara United, Kagere hakamatiki

Klabu ya Simba SC leo Septemba 20 wameendeleza wimbi la ushindi katika Ligi Kuu ya Tanzania Bara baada ya kuwachapa wenyeji wao, Biashara United kwa goli 2-0 kwenye Uwanja wa Karume mjini Musoma mkoani Mara.

Ushindi huo uliotokana na mabao ya washambuliaji wake hatari, Mnyarwanda Meddie Kagere na mzawa, Miraj Athumani ‘Madenge’ unaifanya Simba SC ifikishe pointi 12 baada ya kushinda mechi zake zote nne za mwanzo, mbili ugenini.

Kagere aliye katika msimu wake wa pili Msimbazi tangu awasili kutoka Gor Mahia ya Kenya alifunga bao lake la kwanza dakika ya 22 akimalizia kwa shuti la chini baada ya kros ya Miraji Madenge kutoka upande wa kulia.


Miraj Athumani anayefahamika pia kama Shevchenko ambaye amerejeshwa Msimbaz msimu huu baada ya kuachwa miaka minne iliyopita alifunga bao lake dakika ya 53 kwa kchwa akimalizia mpira wa adhabu wa Ibrahim Ajibu.